سر طاقية الاخفاء 2

يوم جديد
وحدي أتلفت بينكمو ، يا من أنتم حولي
أزعم أني أبدأ أول حرف في سفر التكوين
وأرى الأشياء بعين تجهل معنى الذل
وأذوق الكون بوجد العاشق يلثم وجد المعشوق
وأنادي من فوق الجبل الأجرد في الصحراء
أدعوكم يا أصحاب ويا أحباب ويا فقراء
من يثقب ظلمة هذا الليل ؟
شعر ..فاروق شوشة
قصيدة..الغربة
ديوان..العيون المحترقة


فلاش باك
قبل التتر 1 غرفة وكيل النيابة نهار/داخلي
وكيل النيابة متحدثا ﺇلى عصفور قمر الدين
وكيل النيابة : أنصحك ﺇنك تسلم السلاح الرهيب ده للعدالة
عصفور : أنا معاك يا فندم..الطاقية دي اتعمل بيها جرايم كتيرة
عصفور يناوله الطاقية فيذهب ليرميها في نار المدفأة
آمال : مش هتصعب عليك الطاقية ؟
عصفور: أنا معايا كنز أهم من الطاقية..انتي يا آمال
آمال تنظر له بحب ويتعانقان

قطع
النهاية
(لكن بعد لحظات نجد كلمة النهاية تحذف بالتدريج ونعود ﺇلى المشهد السابق )
عصفور : أنا معايا كنز أهم من الطاقية..انتي يا آمال

وكيل النيابة يتحرك نحو المدفأة ، وفي حين ينشغل عصفور مع آمال ، يدس الطاقية خفية في جيب سترته الداخلي
قطع


فلاش باك
قبل التتر2 غرفة وكيل النيابة ليل/داخلي
وكيل النيابة (عزت الهواري) خلف مكتبه يتحدث ﺇلى أمين الجواهرجي
وكيل النيابة : أنا عندي ليك عرض متحلمش بيه..هاخلصك من السجن ومن حبل المشنقة
أمين : اللي تأمر بيه سعادتك
وكيل النيابة : أنا هاديلك الطاقية وتهرب بيها من هنا . بس بشرط..هاخد نص اللي سرقته
أمين : موافق يا باشا ..موافق طبعا
وكيل النيابة : بس خللي بالك ..لو حاولت تغدر بيا مش هارحمك ..اعترافاتك كلها متسجلة عندي
أمين : بقى ده معقول سعادتك؟ تشيل حبل المشنقة من على رقبتي وأغدر بيك ؟
وكيل النيابة : اتفقنا..
يمد يده ويصافح أمين
قطع

قبل التتر3 منزل سيف الهواري ليل/داخلي
لقطة قريبة لصورة أبيض وأسود لوكيل النيابة مع أمين يصافحان بعضهما ، يبدوان فيها أكبر سنا وأكثر ثراء ، يمسك بالصورة سيف الهواري ابن وكيل النيابة متحدثا ﺇلى حسين ابن أمين ، كلاهما أربعيني قريب الشبه بوالده
سيف الهواري : الله يرحمهم ..كانوا زي الاخوات
حسين أمين : عندك حق..مماتوش غير لما سابونا أصحاب ونسايب


سيف الهواري : لأ وكمان سابولنا ثروة متتقدرش..
سابولنا الكنز ده
يقولها وهو يمسك بطاقية الاخفاء

قطع

تترات البداية


مشهد1 أمام شركة حسين أمين نهار / خارجي
نرى مبنى ضخما شديد الفخامة على واجهته مكتوب (حسين أمين جروب) ،تقترب منه سيارة فارهة ينزل منها حارسان ضخما البنية ، أحدهما يفتح الباب لحسين أمين ، الذي ينزل في بذلة أنيقة ونظارة سوداء ، ويتحرك بكبرياء نحو الشركة
قطع


مشهد 2 طرقة / مديرية الأمن نهار / داخلي
سيف الهواري يمشي بخيلاء في الطرقة وخلفه اثنان من الضباط ، أحدهما يعطيه ملفا يوقع عليه بسرعة ويكمل طريقه بعد أن يحييه الضابط
قطع


مشهد 3 مقهى السعادة نهار / داخلي
قمر الدين ابن عصفور وامال ، شاب بأواخر العشرينات نراه محمولا على الأعناق ، يوزع قبلات في الهواء على جمع كبير من الشباب يهتفون باسمه
الشباب (هاتفين) : شمال ..يمين ..
هنشجع قمر الدين

ينزل قمر ويسلمه أحدهم كأسا يرفعها بسعادة وسط تصفيق الجميع

الشباب (هاتفين بحماس أكبر) : قد الدنيا بقى مشهور..هو قمر الدين عصفور
ثم يفتح الكادر لنرى يافطة مكتوبا عليها :بطولة قهوة السعادة للطاولة والشطرنج
قطع


مشهد 4 صالة منزل عصفور ليل / داخلي
آمال جالسة أمام التلفاز ، وقد صارت خمسينية وبدينة نسبيا ،يفتح عصفور الباب ويدخل باديا عليه اﻹرهاق ، عصفور يقارب الستين يخط الشيب رأسه ، يرتدي نظارة طبية
عصفور : مساء الخير يا آمال
يلقي بنفسه على الكرسي بتعب واضح
آمال : مساء النور..يعني كان لازم شغلانة القناة الفضائية بعد الضهر دي ؟ ده انت مش قادر تقف على حيلك
عصفور : أهو اللي باخده منها بيساعد..انتي شايفة الدنيا عاملة ازاي..وبعدين متنسيش ان القناة فيها حرية أكتر ..الواحد مش ممكن يرتاح غير لما يقول اللي هو عايزه ..وللا انتي خلاص نسيتي الصحافة من يوم ما سبتيها ؟
آمال : أنا هاقوم أحضرلك الأكل
عصفور: أمّال قمر الدين فين ؟
آمال (بحزن) : زي كل يوم ..ع القهوة
عصفور: أنا غلبت مع الواد ده ..مش عارف أعمل معاه ايه؟
آمال : ربنا يهديه
عصفور: مفيش غير عمه فصيح..همه أصحاب وهو الوحيد اللي يقدر يأثر عليه
قطع


مشهد 5 محل فصيح ليل/داخلي
فصيح رجل أربعيني بدين أسمر الوجه يجلس وسط حلقة من أصحابه يدخنون الحشيش ، ﺇلى جواره أحدهم نائم ..يأخذ نفسا من النارجيلة بصوت عال فيبدو عليه الامتعاض ويقول لأحد أصحابه

فصيح : انت جايب الحشيش ده منين ياممدوح ؟
ممدوح: من عند أبو فايزة ياكبير
فصيح: يادي أبو فايزة ! يابني الحشيش بتاعه ده مضروب
يأخذ نفسا جديدا ويمتعض
ده حاطط عليه سحلب ! كل ده علشان خاطر عيون الست فايزة ؟ دي حتى شبهك ..هو انت بتفهم في الستات وللا في حاجة خالص ؟
يوجه خطابه للجميع
فصيح : بيفهم ده ؟
لا أحد يرد..يصفع فصيح النائم الى جواره فيصحو بفزع ويقول
النائم : مبيفهمش يا كبير

يعود للنوم من جديد
فصيح: انتوعارفين أنا طلقت مراتي ليه ؟
يسأل الجميع في صوت واحد متناغم
الجميع : ليه يا كبير ؟
فصيح : علشان ماكانتش بتفهم ..هي فايزة بتاعتك دي ست ؟ فين أيامك يا لولا ؟!
ممدوح : متحكيلنا عن لولا يا كبير
يدع فصيح النارجيلة جانبا ،ويجلس القرفصاء ،ويشرد مع الدخان متذكرا
فصيح : ياااه ! أحكيلكوا ايه وللا ايه ! كانت الحتة كلها تتمنى نظرة منها ..التياترو اللي كانت بتغني فيه كانوا بيقفوا عليه طوابير ..بس هي محطتش عينها غير عليا !
ممدوح (مهللا) : يا سلام عليك ياكبير !
فصيح : مع ﺇني كنت لسه عيل ..بس الراجل بيبان من وهو في اللفة
يصفع النائم فيصحو فزعا
النائم : في اللفة يا كبير
يعود للنوم من جديد
فصيح : أي نعم ..من وهو في اللفة ، وهي كان عندها نظر ..عارفين أنا طلقت مراتي ليه ؟
الجميع : ليه يا كبير ؟
فصيح : علشان ماكنش عندها نظر
ممدوح : وبعدين يا كبير ؟
فصيح : قالت لي عايزاك ..خدتني من ﺇيدي ، وصبت لي كاس ..كاس في التاني في التالت ..
يصمت لبرهة ثم يكمل بنبرة حزن
لحد ما قلتلها على مكان الطاقية
ممدوح : الطاقية ؟ طاقية ﺇيه يا كبير ؟
فصيح : أنا قلت طاقية ؟ انت اتسطلت وللا ﺇيه ؟
يصفع النائم ﺇلى جواره فيصحو بفزع ويرد :
النائم : اتسطل يا كبير
قطع


مشهد 6 مكتب عصفور / جريدة النور نهار / داخلي
عصفور يقلب في مجموعة كبيرة من الجرائد ، تبدو على وجهه الحيرة ، يراقبه زميله عادل في المكتب المقابل
عادل : ﺇوعى تقوللي حسين أمين برضه ؟
عصفور : ورث عن أبوه محلات دهب ، وشركة صغيرة ، وبعدين من عشر سنين اتجوز واحدة عيلتها بيشتغلوا في البوليس بعدها ثروته كبرت بسرعة قوي وبقى عنده كذا شركة ..مش دي الفترة اللي حصل فيها كذا سرقة لبنوك ؟
عادل : ياعم انسى الحكاية دي بقى وريح دماغك .
عصفور : أصلها حاجة غريبة قوي ..وبعدين فيه حاجة..شكله مش غريب عليا !
قطع


مشهد 7 مقهى السعادة ليل / داخلي
قمر الدين وفصيح جالسان وأمامهما طاولة وقدحان من الشاي ..فصيح يغلق الطاولة
فصيح : أديني سبتك تغلبني يا عم ..قوللي بقى..مزعل أبوك ليه ؟
قمر : جرى ايه يا أبو فصيح ما كنا حلوين ؟ ليه السيرة دي بقى ؟
فصيح : ايه أبو فصيح دي؟! قوللي يا عمي ..مادام بكلمك في مستقبلك تقوللي يا عمي ..صحيح أنا أكبر منك بعشر سنين بس ،لكن في الاخر عمك ..يعني ف مقام أبوك..وللا شايفني بلعب معاك ؟
قمر ينظر الى الطاولة
قمر : عندك حق يا عمي .
فصيح : ايه حكايتك ؟ هتفضل ع القهوة كده ليل ونهار ؟
قمر : على يدك ..عملت اللي عليا وخدت البكالوريوس ومفيش وظيفة ﺇلا وقدمتلها ..متعرفش حد يشوفلي أي عقد بره ؟
فصيح : لأ معرفش .
قمر : طب تعالى نكمل لعب
فصيح (بعصبية مسرحية) : يعني خلاص ؟حتفضل قاعد كده ؟ حتسلم من أول جولة ؟ انت عارف أنا طلقت مراتي ليه ؟
قمر : ليه ؟
فصيح : علشان كانت بتسلم من أول جولة
قمر : عموما متخافش عليا ..رمضان قرب وعندي فكرة شغلانة زي الفل
قطع


مشهد 8 أحد شوارع القاهرة نهار/خارجي
يافطة كبيرة مكتوب عليها :قمر الدين للياميش وقمر الدين ..تظهر تحتها فراشة يقف داخلها قمر وسط بضاعة من الياميش
صوت سارينة شرطة
قمر ينظر حوله بترقب..تظهر سيارة شرطة وتتوقف أمام الفراشة ..ينزل ضابط واثنان من العساكر بتحفز
الضابط : هاتولي الواد ده !
قمر يلملم البضاعة بسرعة ويركض هاربا
الضابط : اوعوا يفلت منكم !
قمر يواصل الركض ، ويلقي الياميش من خلفه ..الشرطيان لا يلحقان به ويصيبهما التعب فيجلسان على الرصيف ويتقاسمان الياميش .

قطع


مشهد9 مكتب عصفور نهار / داخلي

عادل زميل عصفور يجلس خلف مكتبه ، يدخل عليه عصفور ويبادره ثائرا
عصفور : معقول اللي حصل ده ؟ يعني ايه أوراق القضية اختفت ومش لاقيينها ؟
عادل : قصدك قضية أراضي الدولة بتاعة حسين أمين ؟
عصفور : أيوه هو فيه غيرها ؟
عادل : نايب المجلس اللي كان رافع القضية مش مصدق وماشي يكلم نفسه ..بيقول ان الأوراق كانت على مكتبه وهو قاعد فيه ومحدش لا دخل ولا خرج ..كأن واحد لابس طاقية الاخفاء دخل سرقها وطلع !
يضحك عادل بسخرية بينما يطرق عصفور ذاهلا
قطع


مشهد 10 فوتو مونتاج
-عصفور أمام الكمبيوتر يبحث في الانترنت
-عصفور يقلب في أوراق ومستندات
-عنوان مقال في جريدة النور : "كيف جمع حسين أمين ثروته الضخمة في سنوات قليلة ؟" مذيل بتوقيع عصفور قمر الدين
-حسين أمين يلقي بالجريدة في غضب

قطع


مشهد 11 مكتب في مديرية الأمن نهار / داخلي
عصفور يتحدث الى مسئول جالس خلف مكتبه
المسئول : انت متأكد يا أستاذ عصفور من الكلام ده ؟ حسين أمين ده رجل أعمال كبير جدا ، ومش شوية ف البلد
عصفور : طبعا متأكد يافندم ، ومستنداتي من واحد كان شغال عنده وقريب منه
المسئول : خلينا على اتصال يا استاذ عصفور ، وأول ما تكمل مستنداتك أوعدك اني هاعمل اللازم
عصفور : متشكر قوي يا افندم
عصفور يقف ويصافح المسئول ويغادر المكتب .
المسئول يرفع سماعة الهاتف
المسئول : صباح الخير ياباشا

قطع


مشهد 12 مكتب سيف الهواري نهار / داخلي
سيف الهواري يتحدث في الهاتف بغضب
سيف الهواري : أيوه يا حسين ..الظاهر عصفورقمر الدين ده مش ناوي يجيبها البر ..أنا عرفت دلوقتي انه بلغ عنك في مديرية الأمن ..متخافش اللي بلغه تبعي ..أنا ممكن أشده بس الدنيا عندي لبش ..بص أنا حابعتهولك لغاية ما ابقى أفضاله ..سلام
قطع


مشهد 13 غرفة بفيلا حسين أمين ليل / داخلي
عصفور مقيد الى عامود وحوله حسين أمين وحراسه..أحد الحراس يضع فوهة مسدس على رأسه ، وآخر يمسك هاتفا محمولا يتحدث فيه عصفور

عصفور : أيوه يا قمر
صوت قمر : أيوه يابابا انت فين ؟ قلقتنا عليك
عصفور : اسمعني كويس يا قمر..روح لعمك فصيح قول له هات الأمانة اللي عندك ..وتعالى بيها على العنوان اللي هاديهولك
قطع


مشهد 14 بيت فصيح ليل / داخلي
فصيح يعطي مظروفا بنيا لقمر..يفتحه فيجد أوراقا واسطوانة كمبيوتر
قمر : الحمد لله انه مضاعش
فصيح : يضيع ازاي ياواد انت وهو عندي؟..انت معندكش ثقة فيا وللا ايه ؟ انت عارف أنا طلقت مراتي ليه ؟
قمر (وهو يقرأ الأوراق) : يييييه ! ليه ؟
فصيح : علشان مكانش عندها ثقة فيا
قمر : دي كلها عن حسين أمين ..أكيد هو اللي خاطف بابا
فصيح : حسين أمين بتاع القرى السياحية ؟
قمر : بتاع كل حاجة
فصيح (بخوف) : طب واحنا هنعمل ايه دلوقتي ؟
قمر: أنا اللي لازم أعمل..لازم أخلص بابا
قطع


مشهد 15 بوابة فيلا حسين أمين ليل / داخلي
-لدى البوابة حارسان مسلحان
-قمر يقف ليراقبهما خفية وعلى ظهره حقيبة
موسيقى توحي بالترقب
(بعد مدة)
-حارس 1 يدخل الى الفيلا
-حارس 2 يتثاءب ويسقط جفناه
-قمر ينتهز الفرصة ويتسلق السور

قطع


مشهد 16 حديقة فيلا حسين أمين ليل / داخلي
حارس 2 يتجه الى البوابة ممسكا بصينية عليها قدحان من الشاي..قمر يباغته من الخلف فتسقط الصينية أرضا
قمر يضع يده على فم الحارس ، ويخرج سكينا يضع نصله على رقبته
قمر : أي حركة هاقتلك..أبويا فين؟
الحارس(بصوت مرتعش) : أبوك مين ؟
قمر : عصفور
الحارس يصمت ويبدو عليه الرعب..قمر يقرب السكين من رقبته
قمر (بعنف) : اخلص !
الحارس(بهلع) : حاضر ! حاضر ! هاوديك
الحارس يقود قمر نحو الغرفة

قطع


مشهد 17 غرفة احتجاز عصفور ليل / داخلي

الحارس 2 وقمر يدخلان الى الغرفة المظلمة حتى يصلا الى عصفور الذي نراه مقيدا
قمر : بابا !
عصفور (بفرحة) : قمر !
قمر (هامسا) : متخافش يابابا ..أنا هاخرجك من هنا ومحدش هيحس بينا
قمر يبدأ في فك قيوده ، لكن الأنوار تشتعل فجأة ونرى سيف الهواري ورجاله يدخلون الغرفة ، ويحاصرون عصفور وقمر
سيف الهواري (متهكما) : ليه كده بس ياقمر الدين ؟ مش قلنالك بلاش تلعب معانا ؟
-يهمس سيف لأحد رجاله بشيء فيترك الغرفة
قطع


مشهد 18 بيت عصفور ليل / داخلي
آمال واضعة كفيها على وجهها خوفا ، أمامها فصيح مطأطئا رأسه
آمال : يعني ايه ؟ يعني عصفور مخطوف وقمر هو كمان راح للي خاطفينه ؟ الاتنين هيضيعوا مني ؟
تلتفت لفصيح وتصرخ فيه
آمال : وانت؟ سبتهم وجاي لي هنا تعمل ايه ؟
فصيح : وأنا كنت هاعمل ايه بس ؟ قمر قاللي متبلغش البوليس
آمال : هو ده اللي قدرت عليه ؟ طبعا ..هو انت بتعرف تعمل حاجة غير انك تحشش؟..كان ليها حق مراتك تخلعك..يا مخلوع !
قطع


مشهد 19 ستوديو قناة فضائية ليل / داخلي
حسين أمين يجلس وأمامه مذيعة تجري معه حوارا
المذيعة (للكاميرا) : عودة مرة أخرى أعزائي المشاهدين لحوارنا مع السيد حسين أمين بمناسبة منصبه الوزاري اللي تولاه بداية من اليوم
تلتفت لحسين
المذيعة : قبل الفاصل سيادتك كنت بتتكلم عن الاصلاح..
حسين أمين : تمام..مشكلة الناس ف مصر انهم مستعجلين..مش قادرين يفهموا ان الحكومة بتعمل خطط اصلاح علشان الأجيال القادمة..وده لأنهم معندهمش بعد نظر وخيال
يخرج حسين علبة قطيفة حمراء صغيرة من جيبه
حسين أمين : يعني حضرتك مثلا تفتكري العلبة دي ممكن يبقى فيها ايه ؟
المذيعة : حاجة دهب ..خاتم مثلا
حسين أمين (بابتسامة) : ده التفكير التقليدي ..العلبة دي يامدام فيها فيل ..
المذيعة (بدهشة) : فيل ؟ !

قطع


مشهد 20 غرفة احتجاز عصفور ليل / داخلي

قمر وعصفور مقيدان الى عمودين متقابلين ، بينهما سيف الهواري في يده علبة قطيفة مماثلة لعلبة حسين
قمر : مش معقول ؟ فيل ازاي ؟
سيف يصفع قمر
سيف : بقولك فيل !
قمر (متألما) : فيل !
-عصفور يلطم خديه
-سيف يصفع قمر
سيف : فيها ..
قمر : فيل !
يستمر في صفعه
سيف : فيها ..
قمر : فيل !
سيف : فيها ..
قمر : فيل !
اختفاء تدريجي

النهاية